Frankryk weier burgerskap oor sluier
2010-02-04 07:42
Leopold Scholtz
Den Haag - Die Franse regering het ’n verdere stap gedoen om Moslem-immigrante te dwing om hulle by die heersende Franse kultuur en gewoontes aan te pas. Franse burgerskap is pas geweier aan ’n immigrant uit Marokko wat sy vrou dwing om die nikaabstyl te dra – ’n sluier wat die hele liggaam en gesig bedek, met die uitsondering van die oë.
Die minister van binnelandse sake, Eric Besson, het ’n dekreet uitgevaardig waarin hy weier om burgerskap aan die Marokkaan te gee omdat sy optrede teen sy vrou teen “sekularisme en vroueregte” indruis, berig die Franse media.
Sekularisme is sedert die Franse Revolusie ’n hoeksteen van die Franse staatsreg en politieke kultuur. Die Islam onderskei nie tussen staat en kerk nie en baie Moslems dring daarop aan dat hul vroue sluiers of kopdoeke moet dra as teken van hul oortuigings.
’n Komitee van die Franse parlement het onlangs besluit om aan te beveel dat die nikaabstyl in staatsgeboue en openbare vervoer verbied word. ’n Verbod op die dra daarvan op straat is ook oorweeg, maar die komiteelede het gemeen dit gaan te ver.
Besson se dekreet is moontlik gemaak deur ’n uitspraak van die Conseil d’Etat of Staatsraad, Frankryk se hoogste hof, dat die Marokkaan se optrede “onversoenbaar” met Franse waardes is.
Die Rooms-Katolieke Kerk het die regering gewaarsku dat Frankryk Moslems se regte moet respekteer as die land van Moslemstate verwag om Christene se regte te respekteer.
Daarteenoor het ’n gematigde Islamitiese Paryse imam, Hassen Chalghoumi, gesê vroue wat hul gesigte wil bedek, moet maar emigreer na Saoedi-Arabië of ander Moslemlande. Volgens die Franse polisie dra slegs 1 900 Moslemvroue nikaab.
- Die Burger