Frankryk herroep borsinplantings
2010-03-31 03:38
Parys – Gesondheidsowerhede in Frankryk het Dinsdag gesê dat hulle ‘n sekere tipe borsinplanting teruggeroep het nadat dit aan die lig gekom het dat die maatskappy wat dit maak, op ‘n bedrieglike wyse ‘n silikoon jel gebruik het wat nie goedgekeur was nie.
Die agentskap wat in beheer is van gesondheidsprodukte in Parys, AFSSAPS, het ook ‘n verbod op die verkope van dié inplantings geplaas wat deur ‘n Franse maatskappy, Poly Implant Prothese (PIP) gemaak word.
Ongeveer 90% van PIP se borsinplantings word uitgevoer.
Tussen 35 000 en 45 000 vroue het reeds sedert 2001 inplantings gehad wat deur die Franse maatskappy verskaf was, het Jean-Claude Ghislain van AFSSAPS gesê.
Volgens hom sal sowat 1000 van hulle ‘n vervanging moet ondergaan.
Die agentskap het hul ondersoek begin nadat hulle ingelig is van ‘n hoë persentasie PIP-inplantings wat al geskeur het.
Inspekteure is na die maatskappy se vervaardigingsperseel in die suide van Frankryk gestuur waar hulle ontdek het dat PIP 'n silikoon jel gebruik wat nie deur gesondheidsowerhede goedgekeur is nie.
Volgens Ghislain kan die jel die skulp wat die vloeistof bevat beskadig. Die jel kan ook makliker as ‘n goedgekeurde jel lek. Dít kan dalk ook verduidelik hoekom so baie PIP-inplantings al geskeur het.
Ghislain het gesê dat borsinplantings normaalweg ‘n lewensduur van tien jaar het.
- Sapa-AFP