Hond dra kleintjies uit vuur... na brandweerwa
2012-08-11 09:03
Temuco, Chili - 'n Ma-hond in Chili het brandbestryders verbaas toe sy nie net haar kleintjies uit 'n brandende huis gered het nie, maar hulle waarskynlik op die veiligste plek moontlik gaan neersit het - in die buik van 'n brandweerwa op die toneel.
Foto's van die brawe brak het Vrydag op die webwerf Reddit Pics verskyn nadat Soy Temuco, 'n plaaslike koerant in Temuco, Chili, die foto's kort na die brand geplaas het, het The Huffington Post berig.
Die honde se eienaar, Omar Torres, moes hospitaalbehandeling ontvang vir brandwonde, maar die hond het daarin geslaag om al haar kleintjies een vir een uit die vlamme te dra.
Soy Temuco het later berig een van die hondjies, Amparo, het weens brandwonde gevrek. Die res van die diere is in 'n stabiele toestand.
