Fort Hood-skieter kan doodstraf kry
2009-11-13 13:02
Houston - Die Fort Hood-skieter, Majoor Nidal Malik Hasan, word aangekla van die moord op 13 mense en sal moontlik tot die dood veroordeel word.
Indien dit bewys word dat Hasan (39) met voorbedagte rade opgetree het, kan hy die doodsvonnis ontvang.
Die saak het kritiek vanuit die Amerikaanse weermag se intelligensiedienste uitgelok ná dit duidelik geword het dat Hasan, ‘n Amerikaanse Moslem, kontak gehad het met ‘n Islamitiese imam wat simpatiek is teenoor Al-Qaeda.
Intelligensiedienste het blykbaar dié informasie ‘n week voor die aanval met die owerhede gedeel.
Die saak word egter nog ondersoek en alle moontlike redes vir die skietery word oorweeg.
- Reuters