Filmmaker van Moslem-film gearresteer
2012-09-28 09:35
Los Angeles – Die vermeende filmmaker van 'n rolprent wat tot betogings in verskeie Moslem-lande gelei het, is Donderdag in hegtenis geneem.
Regter Suzanne Segal het gesê Nakoula Basseley Nakoula sal sonder borgtog aangehou word, omdat hy as 'n vlugrisiko beskou word.
Nakoula, regisseur en vervaardiger van die film Innocence of Muslims, het Donderdag in 'n hof in Los Angeles verskyn nadat hy die voorwaardes van sy voorwaardelike vrylating, wat verband hou met bankbedrog in 2010, verbreek het.
Volgens Robert Dugdale, staatsaanklaer, het die 55-jarige Nakoula glo agt keer sy voorwaardes verbreek. Hy het ook valse verklarings aan beamptes gemaak en minstens drie verskillende name gebruik.
Segal het beslis dat Nakoula, wat wegkruip sedert betogings uitgebreek het, sal sonder borgtog aangehou word. Sy het gesê hy is 'n vlugrisiko en 'n gevaar vir die gemeenskap.
Kommer is uitgespreek oor Nakoula se veiligheid weens wydverspreide woede oor die rolprent wat glo beledigend teenoor Islam is.
Sy hofverskyning het onder streng sekuriteit in Los Angeles plaasgevind.
Die publiek kon nie die hofverskyning bywoon nie, maar joernaliste en ander nuuskieriges kon verrigtinge deur middel van 'n videokonferensie vanuit 'n ander gebou volg.
Nakoula, wat as die regisseur van die film gelys is, is vroeër vandeesmaand ook vir ondervraging in hegtenis geneem.
Nakoula se verskyning kom 'n dag nadat Cindy Lee Garcia, 'n aktrise wat betrokke by die film is, 'n tweede aansoek by die hof ingedien het om YouTube en Google te dwing om die voorprent van die rolprent te verwyder.
'n Regter het haar eerste aansoek verwerp.
– Volg Nuus24 op Twitter
- AFP
