Filippyne: Ontvoerde burgemeester ongedeerd vrygelaat
2012-11-06 10:27
Manila – Vermeende Abu Sayyaf-rebelle in die Filippyne het die burgemeester van die dorp Salug vrygelaat nadat hulle hom sewe maande in 'n woud in die suide van die land aangehou het.
'n Woordvoerder vir die weermag, kapt. Alberto Caber, het gesê Jeffrey Lim is Dinsdag ongedeerd naby die stad Zamboanga vrygelaat en met sy familie herenig.
Gewapende mans wat as polisiebeamptes vermom was, het Lim op 2 April ontvoer toe hy 'n nuwe busterminaal in die dorp Salug besoek het.
Caber het gesê die ontvoerders is nie onmiddelik geïdentifiseer nie, maar owerhede glo die mans behoort aan die Abu Sayyaf-rebellegroep, wat bande met Al-Kaïda het.
Jesus Lim, die burgemeester se pa, het aan die Associated Press gesê sy seun, 'n ingenieur, het begin rook tydens sy aanhouding. Hy het glo ook geteken om sy aandag van sy situasie af te lei.
Volg Nuus24 op Twitter.
- Sapa - AP
