Filippyne: Meer as 300 vissermanne vermis

2012-12-11 07:04

Manila – Die dodetal ná 'n kragtige tifoon in die Filippyne het tot meer as 700 gestyg, en honderde mense word nog vermis, het die land se regering Dinsdag gesê.

Baie van die vermistes is vissermanne wat op see weggeraak het.

Tifoon Bopha, wat op 4 Desember oorstromings en grondverskuiwings oor die suidelike eiland Mindanao veroorsaak het, het 714 lewens geëis en in sommige gevalle hele gemeenskappe uitgewis.

Bykans 115 000 huise is vernietig en meer as 116 000 mense het 'n heenkome gesoek in noodskuilings, waar hulle waarskynlik maande sal moet bly terwyl nuwe huise gebou word.

'n Totaal van 890 mense word steeds vermis. Sommige van dié vermistes kan onder die 257 lyke wees wat deur reddingswerkers gevind is, maar nog nie uitgeken is nie.

Altesaam 313 vissermanne wat op die water was toe Bopha die gebied getref het, is ook soek.

– Volg Nuus24 op Twitter.

- Sapa - AFP