Familiemoord ruk Bulgarye

2013-01-11 13:24

Sofia – ‘n Bulgaarse paartjie, hul twee volwasse seuns en hul ouma is dood in hulle woonstel aangetref met verskeie steek- en skietwonde, het die polisie Vrydag gesê.

Die plaaslike media het berig dat een van die seuns (27), wat aan ‘n geestesversteuring ly, sy familie uitgewis het, en toe selfmoord gepleeg het.

Die polisie het egter geweier om die berigte te bevestig en het net gesê dat ‘n voorlopige ondersoek geen ander mense ten tye van die misdaad by die woonstel kon plaas nie.

Die ouma se bebloede lyk is glo eerste deur die familie se bure, wat ‘n sleutel vir die woonstel het, gevind.

Valery Yordanov, ‘n polisiehoof, sê dat ‘n mes en die pa se geweer op die toneel gevind is.

– Volg Nuus24 op Twitter

- Sapa - AFP