Familie kry misdadiger se oorskot ná 132 jaar

2012-08-02 07:31

Sydney – Die oorskot van Australië se mees berugte misdadiger sal 132 jaar ná sy teregstelling aan sy familie terugbesorg word.

Regeringsamptenare in Victoria het Donderdag gesê Ned Kelly se oorskot sal aan sy afstammelinge oorhandig word.

Kelly was in die 19de eeu die leier van 'n groep bankrowers in Victoria. Hy is in 1880 gehang en sy lyk is vir dekades lank gesoek. Forensiese wetenskaplikes het verlede jaar sy skelet geïdentifiseer nadat dit in 'n massagraf gevind is.

Sy familie het gevra dat sy oorskot aan hulle terugbesorg word sodat hulle 'n ordentlike begrafnis kan hou.

Ellen Hollow, agterkleinkind van Kelly se suster Kate Kelly, het gesê die familie is bly oor die regering se besluit.

– Volg Nuus24 op Twitter

- Sapa - AP