Familie dagvaar ná lyk uit kis val
2009-11-28 04:07
Phoenix – ’n Familie dagvaar ’n begrafnisonderneming en betrokkenes nadat een van hul familielede se liggaam verlede jaar uit ’n doodskis uitgeval het toe dit in die graf geplaas is.
Die werkers van die begrafplaas het na die voorval weggehardloop en die geskokte roubeklaers agtergelaat om die lyk self uit die graf te haal en na die lykswa te dra.
Hulle beweer die gordel van die instrument wat die kis in die graf sak, het gebreek. Die kis het geval, gebreek en die liggaam laat uitval, het die Arizona Republic berig.
Twee familielede het die kis probeer lig, maar die onderkant het losgebreek wat ‘n bewys was van die kis se swak kwaliteit.
Die kinders, die weduwee en twee dosyn familielede van die oorledene, Robert Gowdy Sr. (50), dagvaar die stad van Mesa en sy begrafplaaswerkers, die begrafnisondernemers en die onderneming wat verantwoordelik was vir die maak van die kis.
Die begrafnisondernemers ontken alle aanklagte en sê die lyk het nie uit die kis geval nie.
Die familie het ‘n jaar later ‘n tweede begrafnis gehou.
-Sapa-AFP
