FBI ondersoek naalde in vliegtuig-broodjies

2012-07-18 07:35

Atlanta – Die Amerikaanse federale speurdiens, die FBI, het 'n ondersoek geloods nadat naalde in kalkoentoebroodjies op Delta Air Lines-vlugte gevind is.

Delta Air Lines Inc. het Dinsdag gesê hy gaan probeer vasstel hoe die naaldwerknaalde in vyf kalkoentoebroodjies op vier vlugte vanaf Amsterdam na die Verenigde State van Amerika beland het.

'n Passasier op 'n vlug na Minneapolis is beseer en die ander naalde is op twee vlugte na Atlanta en 'n vlug na Seattle gevind.

Stephen Emmett, ’n spesiale agent van die FBI, het bevestig dat die speurdiens die voorval ondersoek, maar wou nie verder kommentaar lewer nie.

Die Verkeers- en Veiligheidsadministrasie het gesê hy monitor die situasie. Die agentskap het gesê hy het onmiddellik Amerikaanse lugrederye, wat passasiers vanaf Amsterdam se Schiphol-lughawe vervoer, in kennis gestel.

Die toebroodjies is gemaak in die kombuis van die spysenieringsmaatskappy Gate Gourmet in Amsterdam en is bedien aan besigheidsklas-passasiers op Delta-vlugte.

– Volg Nuus24 op Twitter

- AP