Erken Christene in Islam-lande, vra Wulff
2010-10-21 08:47
Brussel – Die leier van ’n Europese land het die eerste keer sonder omhaal van woorde godsdiensvryheid vir Christene in ’n Islamitiese land bepleit.
Pres. Christian Wulff van Duitsland het dit pas op ’n staatsbesoek in Turkye gedoen.
“Die Christendom behoort sonder twyfel tot Turkye,” het hy voor die parlement in Ankara gesê.
“Godsdiensvryheid is ’n deel van hoe ons Europa as ’n waardegemeenskap verstaan.”
Hy het daarop gewys dat Moslems in Duitsland volledige godsdiensvryheid geniet, en vervolg: “Tegelykertyd verwag ons dat Christene in Islamitiese lande dieselfde reg het om hul geloof openlik uit te leef, teologiese opleiding te gee en kerke te bou.”
Daar is nagenoeg 700 000 Christene in Turkye, sowat 1% van die land se 70 miljoen inwoners. Voordat Moslems Turkye in ’n langdurige proses (wat eers in 1453 voltooi is) verower het, was die gebied Christelik en deel van die Bisantynse of Oos-Romeinse Ryk.
Wulff het voorverlede week ’n storm in Duitsland veroorsaak toe hy in ’n toespraak gesê het die Islam behoort tot Duitsland en dat die 4,3 miljoen Moslems in die land nie weggewens kan word nie.
Aan die een kant het die Beierse Christen-Demokratiese premier, Horst Seehofer, geëis dat Moslem-immigrasie nagenoeg tot stilstand gebring moet word. Die bondskanselier, dr. Angela Merkel, het haar party bymekaar probeer hou deur ’n posisie in die middel in te neem: Die Islam het deel van Duitsland geword, maar die multikulturele benadering “het misluk, absoluut misluk”.
’n Emosionele debat woed die laaste maand of twee in Duitsland oor Moslem-immigrante, iets wat in dié mate weens die land se Nazi-verlede vroeër ondenkbaar was. Die publikasie van ’n kritiese boek oor Moslem-immigrasie deur die politikus-bankier dr. Thilo Sarrazin het die damwal egter laat breek.
- Volksblad