Engeland: Man skiet drie familielede, self
2012-01-02 19:42
Londen – 'n Man het na bewering op Nuwejaarsdag drie van sy vroulike familielede in 'n huis in die noordooste van Engeland doodgeskiet, het die polisie Maandag gesê.
Hy het ná die aanval selfmoord gepleeg.
Die polisie het die lyke van die man, 40, en drie vroue by 'n huis in Peterlee gevind ná inwoners van dié klein dorpie skote gehoor het.
'n Haelgeweer is langs die man se lyk gevind, het die polisie gesê, en bygevoeg dat hulle nie tans na enige verdagtes soek in verband met die moorde nie.
Die man het glo 'n lisensie vir sy vuurwapen, en was moontlik 'n lid van 'n skietklub.
'n Tienermeisie het met geringe beserings ontsnap toe sy deur 'n venster op die huis se boonste verdieping kon klim. 'n Man het ook ontsnap, en word deur die polisie beskou as 'n belangrike getuie.
"Hierdie is 'n tragiese voorval. Ons het vier mense wat laasnag gesterf het en ons gedagtes is met hulle familie en vriende op hierdie oomblik," het Michael Banks van die Durham-polisie in 'n mediakonferensie gesê.
– Volg Nuus24 op Twitter.
- Sapa - AFP