Ek’s nie so sleg nie, sê VN-leier
2009-08-31 13:37
Oslo, Noorweë – Ban Ki-moon, die sekretaris-generaal van die Verenigde Nasies (VN), moes homself Maandag verdedig teen negatiewe aanmerkings oor sy leierskapstyl en persoonlikheid.
Noorweë se VN-ambassadeur, Mona Juul, het die Suid-Koreaanse leier van die VN beskuldig van ‘n tekort aan leierskap en charisma.
Ban kry ook gereeld woedeuitbarstings, het Juul in ‘n memo wat aan die Noorweegse media uitgelek is, gesê.
In ‘n besoek vandeesweek aan Oslo het Ban erken dit is niks lekker om gekritiseer te word nie. Hy het egter Juul se kritiek aan kultuurverskille binne die VN toegeskryf en homself verdedig.
“Ek het my eie leierskapstyl en my eie charisma,” het hy gesê.
Juul het in haar memo ook uitgevaar teen die VN se “skitterende afwesigheid” in talle wêreldkrisisse.
Die Noorweegse ambassadeur het onder andere die situasie in Mianmar genoem.
Ban het gesê hy was al twee keer in Mianmar en het al drie keer met die regime se top-generale ontmoet om ‘n vreedsame oorgang na demokrasie in dié land te bewerkstellig.
- Sapa-AP