Eienaars vas na sewe in brand by fabriek sterf

2013-01-30 18:01

Dhaka – Twee eienaars van ‘n klerefabriek in Bangladesj is in hegtenis geneem op aanklagte van nalatigheid na ‘n brand by die fabriek oor die naweek sewe lewens geëis het, het ‘n polisiewoordvoerder gesê.

Zakir Ahmed, voorsitter van die Smart Export-klerefabriek in Dhaka, en Mohammad Sharif Ahmed, die fabriek se besturende direkteur, is Dinsdag in hegtenis geneem, het Gazi Rabiul Islam, ‘n polisiewoordvoerder, gesê.

Die fabriek het glo nie aan die voorgeskrewe brandveiligheid-regulasies voldoen nie.

‘n Brand het Saterdag by die fabriek uitgebreek en sewe lewens geëis. Altesaam 15 mense is ook in die brand beseer.

Altaf Hossain, die pa van een van die slagoffers, het ‘n aanklag by die polisie gelê en beweer dat een van die ingange se hekke gesluit was tydens die brand.

Die polisie sal nadat hulle die eienaars ondervra het besluit of hulle die eienaars ook van moord sal aankla.

– Volg Nuus24 op Twitter