Egpaar smokkel gestremdes om te bedel
2010-01-12 12:24
Hanoi, Vietnam – ‘n Viëtnamese egpaar is aangekla daarvan dat hulle gestremde mense van Vietnam na Thailand gesmokkel het om te gaan bedel, het amptenare Dinsdag gesê.
Volgens Le Hong Bao, ‘n aanklaer in die suidelike An Giang provinsie van Vietnam, het Lam Minh Hoang (59) en sy vrou Nguyen Thi Nga (53) in 2003 van Vietnam na Thailand geëmigreer en besef dat bedelary baie winsgewend is.
In 2006 het hulle na Vietnam teruggekeer waar hulle 10 gestremde mense oor drie jaar gewerf het en toe deur Kambodja na Thailand gestuur het om te gaan bedel.
Die paartjie het glo twee huise gehuur en sewe van die gestremde mense op die straat laat bedel terwyl die ander drie mense items verkoop het. Elk is 9 Amerikaanse dollar (R66) per dag betaal en die egpaar het die res van die geld in hul eie sak gesteek.
Agt van dié bedelaars het later ‘n woordewisseling met die paartjie gehad oor die verdeling van die inkomste en is teruggestuur Vietnam toe.
Hoang en Nga is in Junie verlede jaar in hegtenis geneem en aangekla daarvan dat hulle 'mense onwettig uit die land gestuur het'. Volgens Viëtnamese wetgewing kan elkeen tot sewe jaar tronkstraf gevonnis word as hul skuldig bevind word.
- Sapa