Eerste vroue-president in Suid-Korea bal vuis vir noorde

2013-02-25 11:17

Seoel – Die Suid-Koreaanse politikus Park Geun-Hye, wat Maandag as dié land se eerste vroulike president beëdig is, het gewaarsku dat sy geen uitlokking deur Noord-Korea sal verdra nie.

Sy het met haar beëdiging ook ‘n nuwe era van ekonomiese voorspoed vir die land se inwoners beloof.

Die 61-jarige Park, wat nou aan die hoof staan van Asië se vierde grootste ekonomie, sal voor verskeie groot uitdagings te staan kom, insluitend die veglustige regering van die Noorde, ‘n afswaai in die ekonomie en die stygende koste van maatskaplike toelae.

Park het haar eed voor 70 000 mense in Seoel afgelê.

Sy het onder andere ‘n beroep op die noorde gedoen om sy kernambisies te laat vaar en weer by die internasionale gemeenskap aan te sluit.

“Noord-Korea se onlangse kerntoets is ‘n uitdaging vir die oorlewing en toekoms van die Koreaanse mense en daar moet geen twyfel wees dat die grootste slagoffer niemand anders as Noord-Korea self gaan wees nie,” het sy gesê.

“Ek sal geen optrede verdra wat die lewe van ons mense en die veiligheid van ons nasie bedreig nie,” het Park gesê.

– Volg Nuus24 op Twitter

- AFP