Een miljoen vlug uit Sirië
2013-03-06 12:36
Genève – Die getal Siriese vlugtelinge staan al op een miljoen, en het dié vlak baie vinniger bereik as wat vroeër verwag is, het Antonio Guterress, die VN se hoë-kommissaris vir vlugtelinge, Woensdag gesê.
“Met een miljoen mense wat vlug, miljoene wat intern verplaas is en duisende mense wat nog elke dag die grens oorsteek is Sirië op pad na ‘n volskaalse ramp,” het Guterress gesê.
Die VN het in Desember voorspel dat die getal eers teen die einde van Junie 1,1 miljoen sal bereik.
Buurlande probeer hul bes om die toenemende getal mense wat oor grense stroom, te hanteer, maar dié lande het volgens Guterress “baie ondersteuning” nodig.
Hy het verduidelik dat Libanon se bevolking byvoorbeeld met 10% toegeneem het. Turkye het ook al meer as $600 miljoen (R5,4 miljard) op vlugtelingkampe spandeer.
Die helfte van Sirië se vlugtelinge is kinders, en die meeste van hulle is jonger as 11 jaar, het die VN gesê. Talle van dié kinders is getraumatiseer en het familielede en hul besittings verloor.
– Volg Nuus24 op Twitter
- Sapa-DPA
