Ecuador het nog nie besluit oor Assange

2012-08-15 13:35

Quito – Pres. Rafael Correa van Ecuador het Dinsdag Britse mediaberigte ontken dat sy land ingestem het om asiel aan die WikiLeaks-stigter Julian Assange toe te staan.

"Die gerug dat asiel aan Assange toegestaan is, is vals. Geen besluit is nog geneem nie. Daar word nog op 'n verslag van die ministerie van buitelandse sake gewag," het Correa op Twitter geskryf.

Die 41-jarige Assange woon al sedert 19 Junie in Ecuador se ambassade in Londen om uitlewering aan Swede te vermy waar hy deur die polisie ondervra gaan word oor beweerde seksuele misdrywe.

Correa se verklaring kom nadat Brittanje se Guardian-koerant Dinsdag op hul webwerf berig het dat Ecuador asiel aan Assange gaan toestaan. Die koerant het 'n beampte in Quito aangehaal wie se naam nie genoem is nie.

Correa het later aan verslaggewers in Guayaquil gesê die Guardian "is 'n baie ernstige koerant, maar ek weet nie watter bron hulle gebruik het nie".

In 'n onderhoud laat Maandag, het Correa gesê hy sal na verwagting later vandeesweek oor Assange se aansoek om asiel reageer.

"Ons sal nie later as Woensdag 'n vergadering hou nie," het Correa gesê en na sy diplomate in Londen verwys.

Selfs al word Assange se asiel toegestaan, is dit nie duidelik of hy toegelaat sal word om na Quito te reis omdat die Britse polisie buite die ambassade wag gereed om hom in hegtenis te neem.

– Volg Nuus24 op Twitter.

- AFP