EU-leiers glo lig in die broek
2009-11-20 12:32
Londen – Britse koerante het die aanstellings van die Europese Unie se president en minister van buitelandse sake aangeval en hul selfs lig in die broek genoem wat gaan sukkel op die wêreldverhoog.
Die koerante het ook protes aangeteken oor die agter-die-skerms proses om die twee nuwe leiers gisteraand in Brussels te kies en dit beskryf as, “‘n klap in die gesig vir die grondbeginsels van Britse demokrasie.”
“The Great EU Stitch Up,” het vanoggend op die Daily Mail se voorblad gepryk.
“’n Boetie in die Arbeidersparty van wie niemand nog gehoor het nie, is as die minister van buitelandse sake aangestel sodat ‘n fanatiese federalis, wat wil hê dat Brussel ons moet belas, president kan word. Die goeie nuus? Ten minste is dit nie Tony Blair nie,” het dié koerant gesê.
EU-leiers het die minder bekende Herman van Rompuy, België se premier, as die president van die EU verkies.
Catherine Ashton van Brittanje se regerende arbeidersparty is aangestel as die EU se minister van buitelandse sake.
Graeme Wilson, adjunk-politieke redakteur van die Sun het gesê, “Europa se twee magtigste poste is gister uitgehandig, maar die 500 miljoen mense wat in dié unie woon het geen sê gehad oor wie dit moes vul nie.”
- AFP