EU-hulp kom, maar Grieke woedend oor belasting
2010-05-09 07:22
Kaapstad - ’n Verligte Griekse eerste minister, George Papandreou, het gesê Europa sal binne dae miljarde euros aan Griekeland stuur om dié land met sy skuldkrisis te help.
“In die volgende paar dae sal Griekeland die eerste deel van die €110 miljard (R1 100 miljard) van die Europese Unie en die Internasionale Monetêre Fonds ontvang,” het hy gesê ná ’n laatnag noodvergadering tussen Europese leiers.
“Dit sal ons help om ons (spaarsamigheids-) programme te implementeer.”
Dié programme is ’n driejaarplan deur die Griekse regering om onder meer pensioenfondse te sny en belasting drasties te verhoog.
Griekse burgers het woedend op dié nuus gereageer. Meer as 100 000 mense het Woensdag deur die strate van Athene gemars om teen dié verwikkelinge te betoog. Heelwat betogers het van die skare weggebreek en die parlement probeer bestorm terwyl hulle “Diewe! Verraaiers!” geskree het.
’n Man en twee vroue, van wie een swanger was, is dood toe hulle vasgekeer is in ’n bank wat aan die brand gesteek is. Griekse bankwerkers het Donderdag van die werk af weggebly om teen dié sterftes te betoog. Altesame 41 mense is beseer en 70 betogers is aangehou.
Vrese bestaan dat nóg miljarde euros beskikbaar gemaak sal moet word vir Europese lande met soortgelyke probleme, met Spanje, Portugal, Ierland en Italië wat almal onder druk is.
- Sapa - AFP