EU druk Griekeland na regering van eenheid
2011-11-07 07:01
Parys. – Die Europese Unie (EU) het Sondag groter druk op Griekeland uitgeoefen om vinnig ’n regering van nasionale eenheid tot stand te bring wat die EU se reddingsplan vir die land kan instel.
Olli Rehn, die EU se kommissaris vir ekonomiese en monetêre sake, het aan Reuters gesê die EU is daarvan oortuig dat ’n regering van nasionale eenheid ’n “oortuigende stap sal wees om vertroue in Griekeland te herstel”.
Griekeland het verlede week die vertroue van sy EU-vennote geskend deur onverwags aan te kondig dat hy ’n referendum gaan hou oor die nuutste Europese hulppakket.
Dit het die land se voortgesette deelname aan die eurogebied in die gedrang geplaas. Intussen het die Griekse regering teruggekap en die referendum gaan nou nie meer gehou word nie.
“Werk is in Athene gedoen om daardie vertroue te herstel en ons het môre (Maandag) ’n oortuigende verslag aan die eurogroep nodig van die minister van finansies, ( Evangelos) Venizelos, het Rehn gesê.
Die ministers van finansies van die 17 lidlande van die eurogebied vergader vandag in Brussel.
Gister het die Griekse konserwatiewe opposisieleier, mnr. Antonis Samaras, geëis dat die sosialistiese premier, mnr. George Papandreou, bedank voordat hy bereid sal wees om oor ’n oorgangsregering te praat.
Rehn het egter gesê dis noodsaaklik dat die huidige parlement die nuwe reddingsplan bekragtig en die stappe daarin uiteengesit, instel sodat Griekeland die volgende uitbetaling ingevolge die reddingsplan kan ontvang.
Die Griekse regering het gesê sonder hulp sal sy geld teen middel Desember opdroog.
Intussen het Danny Alexander, ’n hoë amptenaar in die Britse tesourie, gesê die skuldkrisis in die eurogebied ondermyn sakevertroue in Brittanje.
“Uiteraard is die situasie in die eurogebied baie ernstig. Dit beïnvloed sakevertroue hier,” het hy Sondag aan die BBC gesê.
“Altesame drie miljoen poste in die Verenigde Koninkryk is afhanklik van ons handel met die Europese Unie, en daardie mense en ondernemings word deur die onsekerheid geraak.”
Reuters berig uit Beijing dat Yang Jiechi, China se minister van buitelandse sake, gesê het China vertrou dat Europa sy probleme sal uitpluis.
– Volg Nuus24 op Twitter
- Die Burger