Duitsland besluit oor soldate in Afganistan

2012-11-12 18:01

Kaboel – Thomas de Maiziere, Duitsland se minister van verdediging, het Maandag tydens ‘n besoek aan Afganistan gesê sy regering sal eersdaags besluit oor die onttrekking van soldate uit dié land.

De Maiziere het tydens ‘n mediakonferensie saam met sy Afgaanse eweknie, Bismullah Khan Mohammadi, gesê dat die regering binne die volgende week sal besluit hoe die soldate oor die volgende twee jaar uit die land onttrek sal word.

“Eerstens moet mense weet dat die herontplooiing van ons soldate tot die einde van 2014 betroubaar, voldoende en volhoubaar sal wees,” het De Maiziere gesê.

“Ons sal die besluit binne die volgende week maak.”

Duitsland het tans 4 800 soldate in Afganistan.

Die regering het saam met sy Navo-vennote ingestem om tot 2014 soldate geleidelik uit Afganistan te onttrek.

De Maiziere het ook bevestig dat Duitsland saam met sy Navo-vennote sal werk om te besluit watter militêre toerusting in die land sal agterbly wanneer die soldate die land verlaat.

– Volg Nuus24 op Twitter
 

- Sapa - AFP