Duitsland: 1 400 ontruim ná chemiese ongeluk

2012-10-16 16:01

Berlyn – Sowat 1 400 mense is uit hul huise in in Duitsland ontruim nadat ‘n chemiese ongeluk by die Amerikaanse kosfabriek Kraft, ‘n massiewe, giftige gaswolk veroorsaak het.

Die ongeluk in die Bad Fallingbostel-dorpie het Maandag plaasgevind toe werknemers per ongeluk suur in ‘n tenk, wat ‘n natriumhidroksied-oplossing bevat het, gegooi het.

Sowat 700 brandweermanne het Dinsdag steeds probeer om die tenk af te koel. Daar is vrese dat die tenk kan ontplof en tegniese kenners probeer om die suur uit te pomp.

Plaaslike amptenare het dadelik noodmaatreëls begin uitvoer en plaaslike skole, kwekerye en huise is ontruim en gesluit.

‘n Woordvoerder vir die maatskappy het gesê niemand is tot dusver beseer nie.

“Daar was nog geen gevaar vir die inwoners nie, omdat ons saam met plaaslike amptenare besluit het om die dorp as voorsorgmaatreël te ontruim,” het Heike Hauerken gesê.

Produksie is by die fabriek gestaak.

– Volg Nuus24 op Twitter
 

- Sapa - AFP