Duitsers verdeel oor Griekeland
2011-09-14 08:52
Den Haag – Die Duitse regering is tot op die been verdeel oor die vraag wat met Griekeland moet gebeur.
Dr. Angela Merkel, bondskanselier, het haar eie vise-kanselier en leier van een van haar koalisiegenote, Philipp Rösler, pas kliphard daaroor gerepudieer.
Rösler, ook minister van ekonomiese sake, het vroeër gesê die moontlikheid van ’n “beheerde bankrotskap” van Griekeland kan nie meer geïgnoreer word nie.
Merkel se reaksie in ’n onderhoud met ’n Duitse radiostasie was dat die euro die toekoms van Europa gaan bepaal, en dus moet ’n Griekse bankrotskap tot elke prys verhinder word.
Sy het gesê die gevaar dat die krisis ander lande kan laat omval, is groot.
“En dus moet elkeen sy woorde baie versigtig weeg. Wat ons nie nodig het nie, is onrus op die finansiële markte.”
Intussen het pres. Barack Obama van Amerika luidens berigte in die Europese media die Europese Unie (EU) gekritiseer vir sy gebrek aan eensgesindheid insake die ekonomiese krisis.
“Uiteindelik moet die groot lande in Europa en hul politieke leiers ooreenstemming bereik oor ’n besluit hoe hulle die ekonomiese unie met ’n meer doeltreffende en gekoördineerde begrotingsbeleid kan byeenbring,” het hy in Washington gesê.
Volg Nuus24 op Twitter.
- Volksblad