Duitser verkrag dogter glo vir 34 jaar
2011-09-13 21:55
Berlyn – ‘n Nege-en-sestig-jarige man van Nuremberg sal op 497 aanklagte van verkragting teregstaan nadat hy sy dogter na bewering vir 34 jaar verkrag en drie seuns by haar verwek het.
Staatsaanklaer Antje Gabriels-Gorsolke het Dinsdag gesê die saak het onlangs aan die lig gekom toe die 46-jarige slagoffer voorwaardelik vrygelaat is nadat sy vir 'n onverwante misdaad verhoor is. Sy het dié inligting toe aan die polisiebeampte verantwoordelik vir haar toesig beken.
Twee van die seuns is as kinders dood. Gabriels-Gorsolke het gesê sy kan volgens Duitse privaatheidwetgewings nie meer besonderhede óf die identiteit van die betrokke partye bekendmaak nie.
Sy het gesê die mishandeling het begin toe die slagoffer 12 jaar oud was en die verkragtings het hoofsaaklik in die gesin se huis in Nuremberg en in ‘n motor plaasgevind.
Die man, wat sedert Maart in aanhouding is, erken glo hy het seks met sy dogter gehad, maar beweer sy het daartoe ingestem.
– Volg Nuus24 op Twitter.
- AP