Duitse polisie sluit moskee in Hamburg
2010-08-10 09:40
Die Burger
Den Haag – Die Duitse polisie het Maandagoggend vroeg – in die sterkste optrede teen Moslem-radikale sedert 9/11 – ’n klopjag op die groot Taiba-moskee in die woonbuurt Sankt Georg in Hamburg uitgevoer en enige verdere religieuse verrigtinge in die gebou verbied.
Die Duits-Arabiese “kultuurvereniging” Taiba is terselfdertyd verbied.
’n Groep van sowat 20 polisiebeamptes het die moskee se slot omstreeks 06:00 oopgebreek en die gebou binnegegaan.
Rekenaars, boeke en dokumente is gekonfiskeer.
Daar word vermoed voornemende terroriste het die moskee as ’n vergaderplek gebruik.
Die Bundesverfassungsdienst, die Duitse intelligensiediens, het die moskee jare lank dopgehou en vermoedelik ook geïnfiltreer, word berig.
Die moskee het vroeër as die Al-Koeds-moskee bekend gestaan.
Dit was die plek waar verskeie terroriste wat by die 9/11-aanvalle betrokke was, geradikaliseer geraak het.
Onder hulle was Mohammed Atta, Ziad Jarrah en Ramzi Binalsjibh.
Daarna het gematigde Moslemleiers groot moeite gedoen om dié radikale erfenis uit te wis.
In die proses het Taiba, ’n Duitse Moslem-organisasie, dit oorgeneem.
Blykbaar het ekstremiste mettertyd weer die leiding in Taiba oorgeneem, en die Duitse regering het dit Maandag verbied.
Die owerheid het al in Maart verlede jaar ’n groep van 11 Taiba-aanhangers – wat na Pakistan gereis het om daar terreuropleiding te ontvang – dopgehou.
Dit het uiteindelik tot Maandag se klopjag gelei – asook die eerste keer dat ’n moskee in dié land finaal gesluit word.
- Die Burger