Lugskou eindig in tragedie
2010-09-05 22:00
Schnaittach – ‘n Vrou is Sondag dood toe ‘n dubbeldekkervliegtuig tussen toeskouers by ‘n lugskou in suidelike Duitsland neergestort het.
38 mense is tydens die voorval beseer, waarvan vyf ernstige beserings opgedoen het.
Die dubbeldekkervliegtuig het langs ander vliegtuie opgestyg om aan ‘n formasie deel te neem.
Die vliegtuig het regs gedraai en tussen die skare van die lugskou neergestort.
Die voorval het 25 km noord van Nuremberg gebeur.
Volgens ooggetuies het die 46-jarige vrou in die lugskroef van die vliegtuig vasgesit.
Volgens die polisie is die vlieënier nie beseer nie.
“Ons was besig om koffie te drink toe tafels en bankies skielik deur die lug begin vlieg het. Daarna was die vliegtuig se skroef skielik voor ons,” het een ooggetuie gesê.
Volgens ‘n beampte het die vlieënier vermoedelik beheer oor die vliegtuig verloor.
Volg Nuus24 op Twitter.
- Sapa-DPA