Duitse bedrieër in Las Vegas aangekeer
2012-07-28 18:04
Las Vegas – 'n Duitse man wat in Europa gesoek word vir sy aandeel in 'n piramideskema van $100 miljoen (sowat R815 miljoen) is hier in hegtenis geneem ná vyf jaar as voortvlugtige, het Amerikaanse immigrasie-owerhede gesê.
Ulrich Felix Anton Engler, 51, is laat Woensdag deur Amerikaanse owerhede in dié land se dobbelhoofstad aangekeer.
Hy word aangehou vir die oortreding van Amerikaanse immigrasiewetgewing, maar sal waarskynlik gedeporteer word.
"Mnr Engler se inhegtenisname ná vyf jaar as voortvlugtige is 'n welkom dag en 'n belangrike stap om 'n bedrogspul van meer as $100 miljoen oop te vlek," het John Morton, direkteur van die immigrasiebeheeragentskap ICE gesê.
"Ek hoop mnr Engler se slagoffers het in hierdie geval 'n gevoel van verligting dat mnr Engler se bedrog en lang tyd as voortvlugtige verby is en dat hy binnekort voor die hof sal staan in Duitsland om te boet vir sy beweerde misdade."
Engler word in Duitsland gesoek vir sy aandeel in 'n piramideskema wat van Junie 2003 tot Desember 2004 bedryf is deur 'n maatskappy wat hy in Cape Coral, Florida, tot stand gebring het.
Hy staan tereg op aanklagte wat hom tot 20 jaar tronk toe kan stuur.
Engler het na bewering die internet gebruik om beleggers van Oostenryk, Duitsland en Switserland te werf met vals bewerings dat hy dit in die aandelebeurs sou belê.
– Volg Nuus24 op Twitter.
- Sapa - AFP
