Duisende Kanadese hul burgerskap kwyt

2012-09-10 20:23

Toronto – Die Kanadese regering sê hy het met die proses begin om 3 100 mense se burgerskap terug te trek wat dit deur middel van bedrog verkry het.

Jason Kenney, minister van immigrasie, het Maandag gesê aansoekers in die meeste van dié gevalle het ‘n verteenwoordiger betaal om te bewys dat hulle al ‘n sekere tyd in Kanada gebly het, terwyl hulle eintlik in daardie stadium oorsee gewoon het.

Die regering het ook gesê dat hy duisende ander mense ondersoek wat moontlik ook op bedrieglike wyse burgerskap verkry het. Kenney sê mense wat uitgevang word sal dadelik hulle burgerskap kwyt wees.

Die minister sê die stappe kom ná ‘n drie jaar lange ondersoek oor immigrasie-bedrog.

– Volg Nuus24 op Twitter
 

- Sapa - AP