Duikboot help nou seerowery bestry
2010-06-23 08:52
Leopold Scholtz, Volksblad
Den Haag – ’n Nederlandse duikboot vertrek binnekort van die vlootbasis Den Helder na die Golf van Aden om seerowery te help bestry.
Só het die Nederlandse dagblad De Volkskrantgister op sy voorblad berig. ’n Verslaggewer van die koerant was aan boord van die amfibiese troepeskip Hr Ms Johan de Witt, wat tans die kus van Somalië patrolleer, waar die uittredende minister van verdediging, Eimert van Middelkoop, dié aankondiging gedoen het.
Die duikboot sal onder die vlag van die Noord-Atlantiese Verdragsorganisasie (Navo) vaar, wat die laaste jare saam met die Verenigde Nasies en die Europese Unie oorlogskepe in die omgewing van Somalië laat patrolleer om seerowery te voorkom. Tans hou Somaliese seerowers 16 vragskepe gyselaar.
Nederland het vier moderne duikbote met sensitiewe luistertoerusting. Die taak van die boot sal wees om onder water te vaar en klandestien inligting oor seerowerskepe in te win, wat dan aan ander oorlogskepe aan die oppervlak deurgegee kan word om die seerowers te onderskep.
Dit word aangevul deur die gebruik van helikopters aan boord van die oppervlakskepe en maritieme patrollievliegtuie.
Dit sal die eerste keer wees dat ’n duikboot teen die Somaliese seerowers gebruik word.
Die minister het ook bekend gemaak dat ’n bykomende Nederlandse fregat, Hr Ms De Zeven Provinciën, pas uit Den Helder vertrek het om die Navo-taakmag by te staan.
Volg Nuus24 op Twitter