Dronkbestuur Mexikaanse-griep se skuld
2009-07-28 12:43
Wellington, Nieu-Seeland – ‘n Vrou van Nieu-Seeland het die perfekte verskoning gehad toe sy in die hof verskyn het op aanklagte van dronkbestuur.
“Dit is die Mexikaanse-griep se skuld.”
Deborah Karen Graham, ‘n sakevrou van Queenstown, meen die drie glase wyn wat sy gedrink het, het haar bietjie swaarder getref omdat sy steeds herstel nadat sy Mexikaanse-griep gehad het.
Regter, Kevin Phillips, het egter nie hiervoor geval nie.
“Alles is nou dié virus se skuld. Ek aanvaar dit eenvoudig nie,” het die regter gesê.
Graham het ‘n $360 (R2900) boete gekry en mag vir ses maande nie bestuur nie.
Volgens ‘n verslag uitgereik deur Nieu-Seeland se minister van gesondheid, is 72 persone in die hospitaal opgeneem met die virus, waarvan 22 in intensiewesorg is. Daar is sowat 2704 bevestigde gevalle in die land.
Daar het reeds 13 persone gesterf as gevolg van die virus.
–Sapa