Dronk soldaat skiet makkers
2009-09-14 09:10
Cotabato-stad, Filippyne - ’n Soldaat het sy sersant en ’n medesoldaat doodgeskiet ná die sersant hom aangevat het omdat hy dronk was.
Volgens kol. Jonathan Ponce, ’n weermagwoordvoerder, is ’n derde soldaat tydens die skietery gewond.
Sers. Alex Gumata het die soldaat, Korp. Jefferson Brillo, berispe toe hy Sondag dronk vir sy skof by die weermagbasis in Barira, 960 km suid van Manila, opdaag.
Brillo het verdwyn maar het kort daarna met sy dienswapen teruggekeer en op sy makkers losgebrand.
Hy het ná die voorval ontsnap en is steeds soek.
- Sapa-dpa