Dronk lotto-wenner vas vir omkopery
2009-08-18 14:13
Bordeaux, Frankryk – ‘n Man wat €26 miljoen (R295 miljoen) in ‘n Europese boerpot gewen het, is vas ná hy dronk bestuur het en twee verkeersbeamptes probeer omkoop het.
Die verkeersbeamptes het Pascal Brun, 39, Saterdag gevra om sy geel Ferrari beter te parkeer.
Die voormalige slagter het dronk voorgekom, het hulle gesê. ‘n Toets het gewys sy bloedalkoholvlak was vier keer oor Frankryk se limiet, het Sud Ouest-koerant berig.
Brun, wat €26 miljoen (R295 miljoen) in die Franse EuroMillions-boerpot gewen het, het die twee verkeersbeamptes na sy huis genooi vir ‘n drankie. Dáár het hy hulle elk €1 000 (R11 340) aangebied om ander pad te kyk.
Die miljoenêr, wat reeds sy bestuurslisensie vir dronkbestuur verloor het, is weer aangekla van dronkbestuur sowel as poging tot omkopery van ‘n publieke amptenaar.
Hy het ‘n ses maande lange tronkstraf gekry, waarvan drie maande opgeskort is. Brun moes ook €500 (R5 670) aan elke verkeersbeampte betaal.
Die hof het sy opgeboude Ferrari 599 GTB Fiorano gekonfiskeer.
Brun se straf moet egter nog hersien word. Sy prokureur beplan om te vra dat Brun vrygelaat word onder voorwaarde dat hy ‘n elektroniese bandjie dra, in plaas daarvan om tronk toe te gaan.
- Sapa-AFP