Drie vas oor handel in bedreigde spesies
2012-06-26 13:58
Beijing – Drie mans is in die suide van China in hegtenis geneem vir die handel in liggaamsdele van bere en ander bedreigde diere, het die nuusagentskap Xinhua berig.
Sommige van die liggaamsdele word glo van Viëtnam gesmokkel.
Die polisie in die Guangxi-streek het die kriminele bende vroeër vandeesmaand aangekeer en "honderde" beerpote, sowel as beervleis en karkasse van ander diere, insluitend miervreters en skilpaaie, gekonfiskeer.
Altesaam 43 bere is vermoedelik vir hul liggaamsdele geslag. Die vonds het 'n waarde van $3,2 miljoen (sowat R27 miljoen), het Xinhua berig.
In China word die galblase van bere in tradisionele medisyne gebruik, terwyl beerpote 'n duur versnapering is.
Die polisie in Nanning, waar die mans in hegtenis geneem is, wou nie Dinsdag kommentaar lewer nie.
– Volg Nuus24 op Twitter.
- Sapa - AFP
