Drie mans in Gasa gehang oor 'moord'

2012-07-17 20:04

Gasa – Drie mans wat van moord beskuldig is, is Dinsdag in die Hamas-beheerde Gasa-strook gehang, het die gebied se ministerie van binnelandse sake gesê.

Altesaam 14 Palestyne is sedert 2007 deur die Islamitiese groep Hamas tereggestel. Hamas het in dié jaar beheer oor die Gasa-strook geneem. 

Geen besonderhede oor die moorde is beskikbaar nie en slegs die voorletters van die mans wat tereggestel is, is vir identifikasie-doeleindes beskikbaar gemaak.

Volgens wetgewing behoort die Palestynse president, Mahmoud Abbas, die finale seggenskap te hê voordat teregstellings kan plaasvind, maar Hamas voer teregstellings uit sonder om die president te raadpleeg.

Menseregtegroepe het herhaaldelik die gebruik van die doodstraf veroordeel, maar Hamas verwerp dié kritiek.

Die teregstellings word “in ooreenstemming met ons godsdiens uitgevoer (en die) beslissings van die Palestynse wetgewing,” het ’n verklaring van die ministerie gelui.

Altesaam 30 doodsvonnisse is sedert 2007 in die Gasa-strook goedgekeur. Baie mense is tereggestel omdat hulle na bewering aan Israelse veiligheidsmagte hulp verleen het.

– Volg Nuus24 op Twitter.  

- Reuters