Drie Chinese dokters in Nigerië vermoor

2013-02-10 13:10

Kano – Drie Chinese dokters is vroeg Sondagoggend in Potiskum in die noordooste van Nigerië deur gewapende mans vermoor, het die polisie gesê.

“Onbekende aanvallers het omstreeks 01:00  oor die heining van ‘n woonstel in Potiskum gespring waar drie Chinese dokters gewoon het en hulle is keelaf gesny. Niemand is nog in hegtenis geneem nie,” het Sanusi Rufa’i, polisiekommissaris van die Yobe-staat, aan AFP gesê.

Inwoners sê die Chinese was werknemers van die ministerie van gesondheid en woon al vir ‘n jaar in die stad.

Sufa’i het nie gesê of die Islamitiese sekte Boko Haram verantwoordelik was vir die aanval nie.

“Dit is nog vroeg om vinger te wys, maar ons stel ondersoek in,” het hy gesê.

Volgens ‘n plaaslike inwoner is die Chinese se lyke Sondagoggend deur bure in hul kamer gevind.

– Volg Nuus24 op Twitter

- Sapa - AFP