Dreamliner se vlerke geknip weens brandrisiko
2013-01-17 12:30
Tokio – Lugvaart-reguleerders het Donderdag die meeste van die wêreld se 787 Dreamliner-vloot verbied om te vlieg tot ‘n brandrisiko, wat met batterye op die vliegtuig verband hou, opgelos is.
Dit het die krisis vir sy Amerikaanse vervaardiger Boeing verder verdiep.
Reguleerders in Japan, Indië en Chili het die voorbeeld van die Amerikaanse Federale Lugvaartadministrasie (FAA) gevolg deur alle vlugte te kanselleer nadat ‘n Japannese Dreamliner Woensdag gedwing is om ‘n noodlanding te maak.
Die FAA, wat die maatstaf stel vir lugvaartstandaarde, het ‘n “potensiële brandrisiko weens die battery in die 787” geïdentifiseer nadat ‘n battery gelek het op dié All Nippon Airways-vlug.
Analiste sê die ANA-voorval, wat kom ná ‘n rits veiligheidsvrese waarby die Dreamliner in die afgelope weke betrokke was, het noukeurige krisisbestuur van Boeing genoodsaak.
Dié vliegtuie maak staat op batterykrag, eerder as die hidroulika wat in ouer vliegtuie gebruik was. Boeing meen die gebruik van ligte materiaal is ‘n deurbraak vir lugrederye wat graag hul brandstofrekeninge wil sny.
Jim McNerney, die uitvoerende hoof van Boeing, sê die maatskappy “is baie spyt” oor die impak wat die onlangse gebeure op lugrederye en passasiers gehad het en het onderneem om “elke nodige stap” te neem om met die FAA te werk om die probleme op te los.
Nietemin het hy beklemtoon: “Ons hou vol dat die 787 veilig is en ons staan agter sy algehele integriteit.”
Altesaam 39 van die 50 Dreamliners wat oor die wêreld heen deur lugrederye gebruik word, vlieg op die oomblik nie.
– Volg Nuus24 op Twitter
- AFP
