Draaipunt vir Britse media ná afluistery
2011-07-11 07:18
Den Haag – Op dieselfde oomblik dat ’n gewese redakteur van die Britse Sondag-poniekoerant News of the World weens korrupsie en die afluister van selfoonboodskappe in hegtenis geneem is, het David Cameron, premier, effektief die einde van die selfregulering van die media aangekondig.
Die huidige persklagtekommissie gaan geskrap word, het hy op ’n nuuskonferensie gesê. Hy het twee ondersoeke aangekondig, die een ’n strafregtelike ondersoek van die polisie; die ander ’n onafhanklike ondersoek onder voorsitterskap van ’n regter na mediapraktyke.
Cameron het gesê die huidige stelsel werk nie en moet vervang word. Die media moet hulself nie reguleer nie, maar dié taak moet deur ’n onafhanklike liggaam wat buite die media staan, gedoen word.
Presies hoe die nuwe stelsel moet lyk, is ’n vraag wat deur die regterlike kommissie van ondersoek beantwoord moet word.
Hy het terselfdertyd beklemtoon dat die nuwe liggaam ook onafhanklik van die staat moet wees. Cameron het toegegee dat politici en joernaliste in bepaalde gevalle te na aan mekaar gekom het – en dit sluit homself in.
Hy het gesê hy is ten gunste van ’n vrye pers. “Maar persvryheid beteken nie dat die pers bokant die wet moet staan nie.”
Ed Milliband, leier van die Arbeidersparty, het ook in ’n toespraak in Londen gesê die persklagtekommissie is ’n “tandelose poedel”. ’n Nuwe liggaam “met behoorlike ondersoekende bevoegdhede” is nodig.
Intussen het Andy Coulson, ’n vorige redakteur van News of the World, homself aan die Londense polisie oorgegee. Hy is onmiddellik in hegtenis geneem. Coulson was tot onlangs ook Cameron se mediawoordvoerder.
Die Britse media het Sondag groot gewag van die kwessie gemaak. The Daily Telegraph se hoofopskrif het gelui Good-bye, cruel World – ’n verwysing na die klipharde wyse waarop die blad oor seks en skandale berig het.
Die gerespekteerde rubriekskrywer Simon Tisdall, ’n gewese redakteur van The Times, het in sy blog geskryf niemand sal News of the World mis nie. Daily Mail se hoofopskrif, wat feitlik die hele voorblad in beslag geneem het, het geskreeu: Paper that died of shame, met verwysing na eergisteraand se aankondiging dat die koerant Sondag die laaste keer sal verskyn. Daily Express s’n was Shut in shame. News of the World se susterkoerant, The Times, het in ’n hoofartikel geskryf die Sondagblad “het sy rigting en die vertroue van sy lesers verloor”.
Sowat 200 werknemers is summier afgedank. Toe Rebekah Woods, die uitgewer en gewese redakteur, die skok-aankondiging doen, wou sy nog vrae beantwoord, maar die joernaliste was só woedend dat sy vir haar eie veiligheid weggelei is. Woods het haar werk behou.
- Die Burger