Doodstraf gevra ná verkragting van Indiese meisie
2012-12-31 10:09
Nieu-Delhi – Die familie van 'n Indiese meisie wat deur ses mans op 'n bus in Nieu-Delhi verkrag en aangerand is en later in 'n hospitaal in Singapoer dood is, sal nie rus tot haar aanvallers gehang word nie, het haar broer in ‘n onderhoud gesê.
“Die stryd het nou eers begin. Ons wil hê die beskulidgdes moet gehang word, en ons sal daarvoor baklei, tot die einde,” het haar broer aan die Indian Express gesê.
Ses mans staan tereg op aanklagte dat hulle die 23-jarige meisie op 16 Desember verkrag het en haar toe uit die bewegende voertuig gegooi het.
Sy is Saterdag weens haar beserings dood.
Die ongeïdentifiseerde 23-jarige was die fokus van landswye betogings ná nuus oor die voorval gepubliseer is.
Haar pa het aan dieselfde koerant gesê dat sy vrou sukkel om die voorval te verwerk.
“My vrou het die afgelope twee weke skaars geëet,” het die pa gesê.
Hy het bygevoeg dat hy ook sukkel om sy dogter se dood te aanvaar.
“Dit is te pynvol. Ek het nog nie weer in haar kamer ingegaan nie. Sy is in die huis gebore. Haar boeke, klere en alles is hier,” het hy gesê.
Die doodstraf is wettig in Indië, maar teregstellings vind baie min plaas. Slegs een oortreder is in die afgelope agt jaar in Indië tereggestel.
– Volg Nuus24 op Twitter
- Sapa - AFP
