Doodsdreigement ná fopoproep
2012-12-14 09:08
Sydney – Die Australiese radio-aanbieders wat verantwoordelik is vir 'n fopoproep wat gelei het tot die selfmoord van ‘n verpleegster, het verskeie doodsdreigemente ontvang, het die polisie in Australië gesê.
Die polisie het ‘n ondersoek van stapel gestuur ná die aanbieder Michael Christian 'n brief met 'n doodsdreigement ontvang het. Die brief waarsku Christian dat daar “patrone [is] met jou naam daarop.”
Sydney se Daily Telegraph het die brief glo in sy besit. Die dagblad het gesê dat verdere dreigemente in die brief gemaak is, maar dat dit onvanpas is om dit te publiseer.
Die Australiese Uitsaaikorporasie het op sy beurt gesê personeel van Southern Cross Austereo, 2Day FM se eienaars, ontvang al die hele week doodsdreigemente.
Jacintha Saldanha, ‘n ma van twee, het die telefoon geantwoord toe die omroepers, Mel Greig en Christian, die stem van Koningin Elizabeth II en Prins Charles nagemaak het. Saldanha het die telefoon aan 'n kollega gegee, wat die inligting oor die hertogin van Cambridge, Catherine, se gesondheid aan hulle verskaf het.
Southern Cross Austereo kon nie vir kommentaar bereik word nie, maar die Telegraph het berig dat sommige van die maatskappy se personeel na hotelle verskuif is vir hul eie veiligheid. Tien bestuurders het ook lyfwagte gekry.
Christian en Greig, wat tans berading ontvang, was nog nie weer op die lug sedert hulle Maandag op ‘n televisiestasie verskoning gevra het aan Saldanha se familie nie.
– Volg Nuus24 op Twitter
- Sapa - AFP
