Dokter vir godslastering in hegtenis geneem
2010-12-12 14:55
Karachi - 'n Dokter is in Pakistan in hegtenis geneem omdat hy die
profeet Mohammed na bewering beledig het, het polisie Sondag gesê. Dit is die
twede hoë-profielsaak wat die land se omstrede wetgewing teen godslastering
onder die soeklig plaas.
Naushad Valiyani is Vrydag aangehou ná 'n klag deur 'n
mediese verteenwoordiger wat die dokter in die stad Hyderabad besoek het.
"Die arrestasie is gemaak nadat die klaer die polisie
vertel het dat Valiyani sy besigheidkaartjie, met sy volle naam, Muhammad
Faizan, daarop, in 'n drom gegooi het," het streekspolisiehoof, Mushtaq
Shah aan AFP gesê.
"Faizan het Valiyani van godslastering beskuldig en
gevra dat die polisie 'n saak teen die dokter open.”
Shah het gesê die saak is byna opgelos toe Valiyani om verskoning
gevra het, maar plaaslike godsdienstige leiers het tussenbeide getree en op
verdere optrede teen Valiyani aangedring.
"Valiyani het Faizan verseker dat hy nie bedoel het om
die profeet Mohammed te beledig deur die kaartjie in die drom te gooi nie,"
het Shah gesê. Maar die polisie het 'n saak onder die Godslasteringwet
geregistreer.
Verlede maand het 'n Pakistanse hof Aasia Bibi, 'n Christen
ma van vyf kinders, tot dood veroordeel omdat sy van godslastering skuldig
bevind is. Daar is nog nie 'n datum vir haar appèlverhoor vasgestel nie.
- SAPA