Dokter getuig in Indiese moordsaak
2013-02-25 14:15
Nieu-Delhi – ‘n Dokter van Singapoer wat ‘n nadoodse ondersoek gedoen het op ‘n 23-jarige student wat verkrag is, sal Maandag in ‘n videokonferensie getuig in die verhoor van vyf mans wat van haar dood aangekla is, het ‘n prokureur gesê.
Die 23-jarige student, wat in Desember verkrag en met ‘n ysterpaal aangerand is, is dood weens erge interne beserings. Sy het aan haar beserings beswyk nadat die Indiese regering haar per helikopter na ‘n top-hospitaal in Singapoer gestuur het in ‘n laaste poging om haar lewe te red.
“Die dokter wat die nadoodse ondersoek op die vrou by die hospitaal in Singapoer uitgevoer het, sal voor die regter getuig,” het die prokureur, VK Anand, gesê.
Hy het gesê twee ander dokters van die Mount Elizabeth Hospitaal sal ook in die verhoor getuig.
Getuienis oor nadoodse ondersoeke in moordsake is van kardinale belang om die oorsaak van dood vas te stel. Dit sal ook aandui of die dood met opset veroorsaak is, het prokureurs gesê.
Die fisioterapie-student is op ‘n bus in Nieu-Delhi aangeval terwyl sy huis toe teruggekeer het nadat sy ‘n film by ‘n winkelsentrum gekyk het.
Vyf mans staan tereg op aanklagte van onder andere moord, verkragting en roof in verband met haar dood, terwyl ‘n sesde beskuldigde, wat ‘n minderjarige is, apart verhoor word.
– Volg Nuus24 op Twitter
- Sapa - AFP
