Dogtertjie (11) verwaarloos, toe verwurg
2009-09-25 04:26
New York - ‘n Agt-en-twintigjarige man is skuldig bevind daarvan dat hy sy 11-jarige stiefsuster, wat erg verwaarloos was, met ‘n tou verwurg het.
Volgens owerhede is die meisie deur haar ouers verwaarloos en het sy in ‘n huis gevul met diere-ontlasting en vrot vullis geleef.
Alan Jones is skuldig bevind daarvan dat hy sy stiefsuster, Erin Maxwell, op 28 Augustus 2008 verwurg het.
Jones se prokureur het aan die hof gesê Maxwell het haarself per ongeluk gehang terwyl sy besig was om ‘n toneel vanuit die rolprent Pirates of the Caribbean: At World's End, op te voer.
Hy sal op 6 November vanjaar gevonnis word en kan sowat 25 jaar tot lewenslange tronkstraf toegedien word.
Polisie sê hulle het meer as 100 katte in Maxwell se ouers se huis gevind en karkasse van menigte baba katte is ook in die vrieskas gevind.
Owerhede sê Maxwell is gereeld in haar kamer toegesluit en moes ure lank alleen daar deurbring. Sy het geen vriende gehad nie en moes gereeld skool toe gaan met klere aan wat sterk na kat urine-ruik.
Onderwysers by Maxwell se skool het gesê sy is ook gereeld gevang terwyl sy kos uit asblikke neem en dit eet.
Maxwell se ouers is skuldig bevind van kinderverwaarlosing en kan met twee jaar se tronkstraf gevonnis word.
Lindsey en Lynn Maxwell sal op 12 Oktober vanjaar gevonnis word.
- AP