Dodetal styg ná mynramp
2010-10-19 07:30
Beijing – Die dodetal in die naweek se steenkoolmynontploffing in China het tot 30 gestyg, terwyl die hoop vervaag dat sewe vasgekeerde mynwerkers lewend gevind sal word.
Dit het tot woede onder webgebruikers in China gelei wat gevra het vir ’n soortgelyke mynreddingsoperasie soos in Chili verlede week.
Saterdag se voorval in die sentrale Chinese provinsie Henan, wat deur ’n ontploffing veroorsaak is, was die eerste groot mynongeluk in dié land se berugte gevaarlike myne sedert die dramatiese reddingsoperasie verlede week in Chili toe 33 mynwerkers wat langer as twee maande ondergronds vasgekeer was, gered is.
Die staatsmedia het hulle aangesluit by China se groot blogsektor deur die land se bestaande veiligheidstandaarde te veroordeel. Meer as 2600 mense is verlede jaar in myne in China dood.
Reddingswerkers in Yuzhou in Henan het gister nog lyke uit die myn verwyder.
Reddingswerkers het Sondag gesê daar is min hoop dat oorlewendes gevind sal word en dit sal ’n paar dae neem om die vermistes op te spoor.
Chen Jiaguo, een van die 239 mynwerkers wat betyds kon uitkom, het aan die Beijing News gesê veiligheidsones in die myn is hoofsaaklik met puin gevul en daar is geen plek vir reddingstoerusting, kos en water nie.
In ’n hoofartikel het dié staatsbeheerde koerant gesê China se pogings is nie goed genoeg nie. “Indien ons nie in die kortste tydperk moontlik noodreddingstelsels in ons myne kan bou en aan myners ’n kans om lewe kan gee nie...sal meer en meer myners se lewens in gevaar wees.”
Dit het gegons op die internet met baie vergelykings met die Chileense mynreddingsoperasie.
“Die Chileense wonderwerk is die doodsvonnis van die mynveiligheidstelsel in China,” het een internetgebruiker gesê.
“Die verskil met Chili is baie groot. Die myne hier word nie gereeld ondersoek nie en word swak bestuur,” het nog ’n internetgebruiker gesê.
Die Chinese regering het herhaaldelik onderneem om gevaarlike myne te sluit en veiligheid te verskerp. Mynongelukke vind egter gereeld plaas terwyl myne jaag om steenkool te myn omdat 70% van China se energieverbruik daarvan afkomstig is.
Volg Nuus24 op Twitter
- Sapa - AFP