Dodetal styg ná bloedbad in Algerië
2013-01-21 08:01
In Amenas, Algerië – Algerynse amptenare het Maandag verteenwoordigers van ander lande gewaarsku om hulle voor te berei op 'n hoër dodetal ná 'n gyseldrama in die land verlede week in 'n bloedbad ontaard het.
Weermaglede het Sondag volgens berigte die lyke van 25 gyselaars gevind en vyf Islamitiese aanvallers aangekeer by die In Amenas-gasaanleg in die Sahara-woestyn.
Dié nuus volg 'n dag ná die weermag die deel van die kompleks bestorm het wat steeds in die hande van Islamitiese vegters was.
Regerings oor die wêreld heen het probeer om hul burgers op te spoor in die chaos wat gevolg het ná 'n groep ekstremiste buitelanders by die aanleg gyselaar gehou het. Die ekstremiste het geëis dat Frankryk sy militêre ingryping in die noorde van Mali staak.
Dit wil voorkom of talle gyselaars in die laaste stormloop gesterf het. Foto's wat deur oorlewendes geneem is en aan die nuusagentskap AFP vertoon is, wys verskeie lyke met skietwonde.
"Hulle is gewelddadig tereggestel," het 'n Algerynse man wat hom net as Brahim geïdentifiseer het, gesê. Hy het ontsnap, maar hy het gesien hoe 'n groep slagoffers van Japan afgemaai word.
Getuies het gesê nege Japanse werkers is in die treurspel dood.
Minstens 23 buitelanders en Algeryne se dood is bevestig sedert die drama Woensdag begin het.
Die Ennahar-televisiestasie het berig dat die lyke van 25 gyselaars Sondag gevind is deur weermaglede wat die aanleg gefynkam het. Minstens 32 van die aanvallers is ook dood.
"Ek is bevrees (die dodetal) sal opwaarts aangepas word," het Mohamed Said, Algerië se minister van kommunikasie, aan 'n radiostasie gesê.
– Volg Nuus24 op Twitter.
- AFP
