Dodetal in Filippyne bereik 300

2012-12-06 09:16

Manila – Meer as 300 mense is dood en bykans 180 000 is dakloos gelaat ná 'n erge tifoon die Filippyne getref het, het amptenare Donderdag gesê.

Tifoon Bopha het bome ontwortel, dakke afgewaai en kragdrade beskadig. Die elektrisiteitstoevoer na sommige stede is ook afgesny.

Benito Ramos, ‘n regeringsamptenaar, het gesê die regering se prioriteit is op die oomblik om 379 vermiste mense te vind en om skuiling vir 179 000 mense te kry wat deur die tifoon dakloos gelaat is.

“Daar is nie ‘n perk nie, so lank as wat dit neem,” het Ramos gesê toe hy gevra is hoe lank die regering na die vermistes sal soek.

Geskokte oorlewendes het Donderdag na hul huise teruggekeer om te soek na enigiets wat nog gebruik kan word.

Ramos het gesê 325 mense is dood en 411 is tydens die tifoon beseer.

Die VSA het aangebied om steun aan die land te verskaf.

 – Volg Nuus24 op Twitter
 

- Sapa - AFP