'Dit was soos Titanic'
2012-01-14 12:18
Rome – 'n Chaos het geheers toe 'n luukse passasierskip Vrydagaand aan die Toskaanse kus gestrand het en minstens drie mense is dood, het die Italiaanse kuswag gesê.
Sowat 4 200 mense moes reddingsbote gebruik om 'n nabygeleë eiland te bereik ná die Costa Concordia se romp beskadig is.
Francesco Paolillo van die Italiaanse kuswag het bevestig dat drie lyke in die see gevind is. Berigte dat nóg drie mense dood is, kon nog nie bevestig word nie.
'n Passassier, Mara Parmegiani, wat ook 'n joernalis van beroep is, het aan die ANSA-nuusagentskap gesê die voorval was "soos 'n toneel op die Titanic."
"Ons het aandete aan boord genuttig toe ons 'n harde klank gehoor het, soos die romp van die skip wat oor iets sleep," het Luciano Castro, 'n passassier en joernalis, vroeg Saterdag op 'n Italiaanse radiostasie gesê. Die ligte het afgegaan "en daar was tonele van paniek," het Castro gesê.
'n Soektog op die skip het teen dagbreek begin om seker te maak dat niemand aan boord vasgevang is nie.
"Niemand hang uit, skreeu, of roep dat hulle hulp nodig het nie, maar tot die soektog verby is, sal ons nie weet nie."
"Daar is sowat 2 000 eenhede, en die skip is nie regop nie," het Paolillo gesê.
Sowat 50 mense wat op die Costa Concordia vasgekeer was, is vroeër deur helikopters opgepik, het Paolillo aan die nuusagentskap AP gesê vanuit die Toskaanse hawestad Livorno.
Hy het ook gesê dat dit nog nie duidelik is presies hoe die passassiers wat dood is, gesterf het nie.
Altesaam 30 mense is volgens berigte beseer, en twee van hulle is in 'n kritieke toestand.
Die skipbreukelinge het skuiling gevind in skole, hotelle en 'n kerk op die klein Toskaanse eiland Giglio. Ander is na Porto Santo Stefano aan die Italiaanse kus geneem.
– Volg Nuus24 op Twitter.
- Sapa - AP