Dit is hel in Haïti
2010-01-19 08:26
Port-au-Prince - Die situasie in Haïti is katastrofaal, het die Internasionale Komitee van die Rooi Kruis Maandag gesê.
“Gegewe die skaal van die behoeftes is die taak wat humanitêre organisasies in die gesig staar skrikwekkend,” het Riccardo Conti, die organisasie se plaaslike hoof, gesê.
Woede oor die stadige pas met noodleniging ná die aardbewing daar ’n week gelede het gister feitlik uurliks toegeneem. “Maak dat julle wegkom!” het party oorlewendes in die hoofstad se krotbuurt Bel-Air geskree, klaarblyklik gefrustreerd omdat hulle buitelanders gesien het wat nie hulp verleen nie.
Al het soldate, dokters en noodhulpwerkers steeds Maandag na Haïti gevlieg, het honderdduisende slagoffers van die aardbewing nog gesukkel om net ’n koppie water of ’n handvol kos te vind.
Tandepasta is baie gesog onder plunderaars, want mense smeer dit onder hul neuse om die stank van ontbindende liggame te verdryf.
“Daar is min tekens van betekenisvolle verspreiding van hulp,” het Dokters Sonder Grense gesê. Dokters van dié organisasies het selfs op straat ledemate geamputeer.
Lt.genl. Ken Keen, grondbevelvoerder van die Amerikaanse leër, het erken daar is ’n oponthoud by die lughawe, wat net ’n enkele aanloopbaan en min parkeerplek vir vliegtuie het.
’n Man (30) en 40-jarige vrou is Sondag uit die puin van ’n ineengestorte supermark bevry waar hulle oorleef het deur van die winkel se kos te eet. Die vrou, me. Mimi Dittmer, het die supermark verlede Dinsdag al verlaat, maar het teruggegaan om iets te koop wat sy vergeet het toe die aardbewing plaasvind.
’n Dominikaanse meisie (16) is ook uit ’n hotel gered.
Daar is steeds lewende mense in ineengestorte geboue, het me. Elisabeth Byre, VN-woordvoerder, gesê. “Hoop bly voortbestaan.”
Plundery het gister na meer dele van die middestad van Port-au-Prince versprei. Honderde jong mans en seuns het oor stukkende mure geklim om by winkels in te breek om te vat wat hulle ook al kan kry.
Op een plek het jeugdiges met gebreekte bottels, pangas en skeermeslemmetjies oor ’n voorraad rum baklei. “Ek drink soveel ek kan. Dit gee moed,” het Jean-Pierre Junior gesê. Hy was met ’n stuk plank waarin spykers gekap is, gewapen om sy bottel rum te beskerm.
Tog het Keen gesê daar is minder geweld in die hoofstad as voor die aardbewing. “Is daar bendegeweld? Ja. Was daar bendegeweld voor die aardbewing? Absoluut.”
Intussen het Europese nasies meer as ’n halfmiljard dollar vir hulp op kort en lang termyn belowe.
Talle Haïtiane is egter besig om moed te verloor.
“Ons gaan dood,” het ’n vrou gesê.
Die Pan-Amerikaanse Gesondheidsorganisasie raam tussen 50 000 en 100 000 mense is in die aardbewing dood, maar Haïtiaanse owerhede dink dis meer. Altesaam 46 VN-personeellede is onder die dooies en nog 500 word vermis.
So baie mense het hul huise verloor dat die Wêreldvoedselprogram beplan om ’n tentkamp vir 100 000 mense op te rig.
- ’n Aardbewing wat volgens voorlopige ramings 6,0 op die Richterskaal geregistreer het, het dele van Guatemala en El Salvador Maandag getref, maar daar was geen onmiddellike berigte van beserings of skade nie.
- Sapa, AP