Diplomate wat sigarette smokkel vas
2009-11-21 21:25
Stockholm – Polisie in Swede het twee diplomate van Noord-Korea in hegtenis geneem nadat hulle glo 230 000 sigarette in dié land probeer insmokkel het.
Die verdagtes, ‘n man en ‘n vrou, het diplomatieke status in Rusland. Owerhede het hulle Woensdagoggend voorgekeer toe hulle per veerboot Swede vanaf Helsinki, Finland se hoofstad, probeer binnegaan het.
“Owerhede het Russiese sigarette in die voertuig wat aan die twee behoort, gevind,” het Monica Magnusson, ‘n woordvoerder gesê.
Hulle het diplomatieke onskendbaarheid geëis maar is in hegtenis geneem omdat hulle nie diplomate in Swede is nie.
"Hulle het slegs diplomatieke status in Rusland maar nie in Swede nie en is vir beweerde smokkelary in hegtenis geneem,” het Magnusson gesê.
Sy het bygevoeg dat die twee verdagtes steeds deur Sweedse polisie aangehou word en dat sy nie bewus is daarvan dat hulle sedert hulle inhegtenisname kontak met owerhede in Noord-Korea gemaak het nie.
- Reuters